Lykilorð Piglet

Baddi grís horfir á þegar mamma hans er sett upp á vörubílspall og ekið í burtu. Svo er farið með litla grísinn hennar mömmu sinnar á markaðinn í sveitinni. Þar sjá forlögin til þess að leiðir bóndans Arthurs Hoggetts og Babe litla liggja saman. Báðir skynja að þessi kynni eiga eftir að verða örlagarík. Heima á bænum taka sum dýrin Babe opnum klaufum en nokkrar skepnur afhjúpa eigið svínslegt eðli með framkomu sinni við litla vingjarnlega grísalinginn. Baddi afræður að brjótast úr viðjum samfélagsins á bóndabænum, komast í ábyrgðarstöðu í dýraríkinu og gerast fjársvín. Hann kemur sér því í fóstur hjá Collie-hundinum á bænum, Fly, og lætur háðsglósur kattarins og annarra smásálna í umhverfinu sem vind um eyrun þjóta en heldur uppi röð og reglu í hjörðinni. Babe uppsker svo eins og hann hefur til sáð þegar hann tekur þátt í keppni smalahunda í héraðinu. Þar ræðst framtíð hans og svar fæst við spurningunni um hvaða framtíð bíði litla sæta gríssins.

Eins og svo oft áður rekur löngun Bangsímons hann til að næla sér í dálítið hunang frá býflugunum sem eru alls ekki á því að láta það af hendi möglunarlaust. Bangsímon þarf því að flýja eins og fætur toga, ekki í fyrsta skipti og alls ekki það síðasta. Seinna misskilur Bangsímon bréf frá Robin og sannfærist um að honum hafi verið rænt af einhverjum sem kallar sig “Kembráðum Aftur”. Til að bjarga Robin safnar Bangsímon öllum vinum sínum saman og það er ákveðið að frelsa drenginn áður en það verður um seinan. Á meðan á Eyrnaslapi í hinni verstu krísu því hann vantar nýjan hala. Af þessum sökum er hann einstaklega niðurdreginn en samt til í að prófa hinar ýmsu gerðir af “skottum” sem félagar hans í skóginum mæla með. Og þetta er bara brot af þeim skemmtilegheitum og ævintýrum sem bíða kvikmyndahúsagesta, en óhætt er að fullyrða að hinir fullorðnu eigi eftir að skemmta sér jafn vel og yngri kynslóðirnar yfir uppátækjum Bangsímons og félaga.

Skammarstrik Emils eru víst fleiri en eyjarnar í Breiðafirði, er Mamma hans vön að segja. En hann hefur einnig tíma til að gera heilmargt annað. Á uppboðinu í Backrova gerir Emil sérkennileg viðskipti. En það merkilegasta gerist þegar að Emil bjargar lífi nýgotins grís. Emil hugsar ekki bara vel um grísinn, hann kennir honum að sitja, hoppa og gera margar aðrar kúnstir. Enginn í Hlynskógum hefði getað ímyndað sér að lítill grís gæti gert svona nokkuð.